इरानले हाल अमेरिकासँग कुनै पनि प्रकारको वार्ता नभएको स्पष्ट पारेको छ ।
इरानी विदेश मन्त्रालयका प्रवक्ता इस्माइल बाघेइले सोमबार नियमित पत्रकार सम्मेलनमा यस्तो जानकारी दिएका हुन् । उनले होर्मुज जलमार्ग हुँदै सुरक्षित आवतजावत गर्न भने ओमानसँग छलफल भैरहेको बताए ।
अमेरिकी राष्ट्रपति डोनाल्ड ट्रम्पले इरानसँग शान्तिवार्ता सोमबार देखि सुरु हुने दाबी गरेको केही समयपछि इरानले यस्तो प्रतिक्रिया दिएको हो ।
प्रवक्ता बाघेइले भने, “हामी अहिले अमेरिकासँग वार्ता गरिरहेका छैनौं । हाम्रो वार्ता होर्मुज जलमार्गबाट सुरक्षित यात्रा आवतजावत गर्ने विषयमा ओमानसँग भैरहेको छ ।” उनले ओमानसँग सम्भावित सहमति भए पनि त्यसले मात्र व्यवसायीक जहाजका लागि होर्मुज जलमार्ग पूर्ण रुपमा खुल्ने अवस्था नआउने बताए ।
अमेरिकाले आफ्नो आक्रामक गतिविधि जारी राखेसम्म होर्मुजको अवस्था यथावत् रहने र जलमार्ग पूर्ण रुपमा सञ्चालनमा आउन सक्ने अवस्था सिर्जना नहुने उनले बताए ।
इरानमा भीषण आक्रमण गर्ने घोषणा गरेका अमेरिकी राष्ट्रपति ट्रम्पले भने एकाएक आक्रमण स्थगित गरेर सम्झौताको प्रतिवेदन तयार भएको र इरानसँग वार्ता सुरु हुने दाबी गरेका थिए ।
