नेकपा (एमाले) संसदीय दलको नेतामा रामबहादुर थापा ‘बादल’ निर्विरोध चयन भएका छन् ।
बुधवार पार्टी मुख्यालय च्यासलमा बसेको एमाले संसदीय दलको बैठकले उपाध्यक्ष बादललाई सर्वसम्मत रुपमा संसदीय दलको नेता चयन गरेको हो । बादल एमालेको तर्फबाट समानुपातिक सांसदमा निर्वाचित भएका थिए ।
एमाले संसदीय दलको नेतामा युवा नेता सुहाङ नेम्वाङले पनि दाबी गरेका थिए, तर अन्तिममा आएर उनी पनि फिर्ता भए । निर्विरोध रुपमा दलको नेता चयन भएका बादललाई नेता सुवाङले खादा लगाएर बधार्ई समेत दिएका छन् ।
प्रतिनिधि सभामा एमालेले प्रत्यक्षमा ९ र समानुपातिकमा १६ सिट जितेर तेस्रो दल बनेको छ । एमाले अध्यक्ष केपी शर्मा ओलीसहित शिर्ष नेता चुनावमा पराजित भएपछि माओवादी पृष्ठभूमिका बादलले एमाले संसदीय दलको नेता बन्ने मौका पाएका हुन् ।
