दिनेश शर्माद्वारा टेक्सस राज्यको सांसद पदमा उम्मेदवारी दर्ता

काठमाडौं। अमेरिकाको टेक्सस राज्यमा लामो समय देखि बस्दै आएका नेपाली मूलका दिनेश शर्माले टेक्सस राज्यको सांसद पदमा उम्मेदवारी दिएका छन् । सूचना प्रविधि (आइटी) विज्ञ, सामाजिक अभियन्ता शर्माले टेक्सस राज्यको प्रतिनिधि सभा सदस्यको लागि निर्वाचन क्षेत्र ९२ (हाउस डिसट्रिक्ट ९२ )बाट उम्मेदवारी दर्ता गराएका हुन् ।

उनले नोभेम्बर २० शनिबारका दिन टेक्ससको समय अनुसार दिउँसो ४ बजे डेमोक्रयाटिक दलको टेरन्ट काउन्टीको फोर्ट वर्थ कार्यालयमा उम्मेदवार मनोनयन पत्र बुझाएका छन् । उनी डेमोक्रयाटिक हुन् या हैनन् भनि दलले अनुमोदन गरे पछि निर्वाचन आयोगलाई डेमोक्रयाटिक दलले उनको उम्मेदवारी आफैं पठाउने छ ।

उनी आम निर्वाचनको लागि उम्मेदवार नभई उनले प्राथमिक निर्वाचनमा आफ्नै दलका उम्मेदवारहरूसँग प्रतिस्पर्धा गर्नु पर्ने हुन्छ । उनले डेमोक्रयाटिकको तर्फबाट प्राथमिक निर्वाचनमा बाजी मारे भने उनको भिडन्त आम निर्वाचनमा रिपब्लिकन दलका उम्मेदवारसँग हुनेछ । उनी डेमोक्रयाटिक दलसँग आबद्ध भएकोले उनी डेमोक्रयाटिक दलको तर्फबाट लड्ने छन् । टेक्सस राज्यको तल्लो सदन प्रतिनिधि सभामा हाल रिपब्लिकनका ८५ र डेमोक्रयाटिक दलका ६५ जना प्रतिनिधि सभा सदस्य (सांसदहरु)रहेका छन् ।

टेक्सस प्रतिनिधि सभाको निर्वाचन आगामी २०२२ मा हुनेछ । अर्थात् आम निर्वाचन नोभेम्बर ८,२०२२ मा तोकिएको छ । टेक्ससको प्रतिनिधि सभाको प्राथमिक निर्वाचन मार्च १,२०२२ मा हुनेछ । साथै सर्वाधिक मत प्राप्त गर्ने दुई जना शीर्ष उम्मेदवारहरू बीचको निर्वाचन मे २४ ,२०२२ राखिएको छ ।

चुनाव लड्नेले आगामी डिसेम्बर १३,२०२१ सम्म मनोनयन दर्ता गराई सक्नुपर्ने छ । टेक्सस हाउस अफ रिप्रिजेन्टेटिभ्स (प्रतिनिधि सभा) २०२२ मा चुनाव हुने ८८ राज्य विधायिका च्यामबर्स (सदनहरु) मध्ये एक हो। अमेरिका भरि ९९ वटा सदनहरू छन् ।

शर्मा हाल टेक्सस राज्यको फोर्ट वर्थमा बसोबास गर्छन् भने उनको नेपाल घर धरान हो । नेपाली समाज टेक्सस (एनएसटी)का अध्यक्ष शर्मा विभिन्न संघ संस्था संग आबद्ध रहेका छन् । उनले सूचना प्रविधि (आइटी)मा उच्च शिक्षा भारतबाट प्राप्त गरेका थिए भने अमेरिकामा एपल ,भेराइजन जस्ता ठूला संस्थाहरूसँग आबद्ध छन् ।